漢族四大傳統節日的清明節

清明/杜牧（原詩）
清明時節雨紛紛   路上行人欲斷魂
借問酒家何處有   牧童遙指杏花村


清明/劉惠蓉（台文）
清明疫情亂紛紛  關門閂戶失神魂
敢問喙罨佗位有  政府出聲講免囤


掛喙罨/劉惠蓉 (台文)
清明疫情亂 逐家掛喙罨 祭拜簡單辦 毋是咱頇顢


這改的武漢肺炎~造成全世界的經濟崩盤，佇百花齊開的春天，煞也感覺會畏寒，上蓋予逐家煩惱的是穢著這種傳染病毒的國家愈來愈濟，更加予人驚惶是一工比一工閣較嚴重的疫情，到底愛按怎去做，毋才袂予病毒繼續湠開，這應該是現此時國際攏愛重視的事工。


目前的臺灣，雖然有政府衛生福利部佮行政院團隊，努力咧守護、把關，更加有真濟冒著危險佮時間走相逐，佇第一線的醫護人員，in辛苦大愛的精神，就是希望共咱這粒美麗島嶼~福爾摩沙顧予好，莫受苦難折磨，但是，看著病例不斷增加，咱有可能因為某幾寡人人權訴求和公論影響，自按呢開放予遐境外入來隱藏的危機，敢會予真無簡單控制了誠好的防疫破功咧? 


所擺佇遮，惠蓉欲共各位親朋好友志講，清明連假的這幾工，雖然是咱生活當中追思祭拜上蓋重要的傳統年仔節啊，毋過，為著避免人佮人的絞群集倚做伙，逐家一定愛預防無必要的感染機會，上好配合專家的呼籲，咱今年就共祭祀的科儀簡單化，以著虔誠敬拜的心意就好啊啦!
特別欲閣 懇求遐夆人限制出外，蹛家己徛家『居家隔離』的民眾，予人拜託一个，毋通跤驛驛四界拋拋走，害新冠病毒颺颺飛，做一个顧人怨的毋成人。
感謝逐家收聽，我是曾文溪廣播電台「台灣文化鹹酸甜」的主持劉惠蓉，惠蓉佇清明節連紲假期，祝福逐家平安、快樂!
(20200403書寫兼錄音) 


後記：
近來身體佮聲音無蓋好，感謝下晡會當用平常心錄音分享予逐家，雖然臨時書寫錄音，凡勢有所在講了無蓋端摘，但是，用母語講咱生活中的文化，是惠蓉滿滿的誠意。